Seleçom de vídeos arredor de Carvalho Calero

O apartado de destaques audiovisuais tanto do Portal Galego da Língua como deste site  atualiza-se com material de mediateca com foco no professor Carvalho Calero, homenageado este ano na celebraçom das Letras Galegas. Assim, para além do documentário sobre o Decreto Filgueira, acrescentamos a avaliaçom do presidente da AGAL, Eduardo Maragoto, perante o nomenamento de Carvalho Calero como protagonista das Letras deste ano 2020. Incorporamos também material didático como um vídeo de dicas de leitura para pessoas nom afeitas a lerem em reintegrado, convidando de passo à participaçom na leitura continuada de Scórpio, para a que já está aberto o prazo de inscriçons aqui.

Também se inclui um outro vídeo com um trecho de leitura de “O lar de Clara”, conto incluído na narrativa completa de Carvalho Calero, lido polo filólogo ordense Paulo Fernandes Mirás. Assim como também os poemas musicados de José Luís Fernández Carnicero que noticiamos recentemente.

Em outra ordem de materiais históricos, acrescentamos o documentário “Carvallo Calero, a posibilidade de rectificar a historia”, coproduzido por A Nosa Terra e a Asociación Socio-Pedagóxica galega em 1991. Com guiom de Francisco Rodríguez e produçom de Xan Carballa, com base narrativa numha entrevista realizada por Francisco Salinas Portugal ao professor Ricardo Carvalho Calero (recolhida no livro “Voz e silencio” de Edicións do Cumio, 1991). A realizaçom do vídeo, de apenas 20 minutos, contou com umha ajuda da Universidade de Santiago e o filme em formato VHS incluiu-se na ediçom esse mesmo ano dum especial de A Nosa Terra-A Nosa Cultura, dedicado a Carvalho Calero.

Mais um material de particular valor histórico é o debate de Carvalho Calero, como catedrático de Língua e Literatura Galegas na Universidade de Compostela, com Constantino Garcia, catedrático de Linguística Románica na mesma universidade, intitulado “O porvir do galego”, emitido na Televisom da Galiza em maio de 1987, no programa A duas bandas, moderado por Manuel Fernández Areal.

Ainda, mais um documento destacado é a conferência de Ricardo Carvalho Calero sobre a narrativa de Ramón Otero Pedrayo, nas I Jornadas de Didática da Língua e da Literatura, celebradas na Escola de Magistério de Santiago de Compostela em fevereiro de 1989. A gravaçom original foi realizada e montada por Ramom Reimunde Norenha, quem cedeu o material à Academia Galega da Língua Portuguesa. A digitalizaçom e ediçom é de Celso Alvarez Cáccamo (2019).

E finalmente, outro material de interesse é o capítulo de 1987 do programa cultural A Trabe de Ouro da TVG em que o atual presidente da RAG, Víctor F. Freixanes entrevista Carvalho Calero, que podes ver aqui.